Atelye sou rechèch, konsèvasyon anfibyen ak biodivèsite Forèdèpen (Mòn Lasèl)

Program Edikasyon sou anfibyen an se youn nan poto mitan projè sa ki pi enpòtan, paske se yon baz solid pou garanti konsèvasyon ak proteksyon anfibyen yo. Se nan kad edikasyon nou ka senen yon bonjan program sou proteksyon anvironman pou sansibilize moun k’ap viv menm kote ak bèt lavi-yo pi menase. Avèk zouti sa nou vle ankouraje moun nan kominote sa yo manifeste yon enterè san parèy pou konnen enpòtans bèt yo epi montre yo se zantray anvironman epi yo makònen ak lavi nou. Se poutèt sa travay edikasyon anvironmantal nou an touche ti moun-yo an premye, epi jèn, granmoun ki ap viv nan lantouray espès krapo nou sible yo, kote n’ap fè rechèch sou yon an Mòn Lasèl ak Chenn Mòn Macaya.

Pwogram edikasyon sa fèt pou aprann moun nan kominote yo enpòtans anfibyen (krapo) nan lanati epi montre vale anvironmantal yo ak ekosystem yo. Se konsa nou pral fè yon atelye sou edikasyon anvironmantal pandan dezèd (2èd) tan pou’n bay yon ti detay sou kèk enfòmasyon nesesè pou pi piti pase trant (30) elèv lekòl ansanm.
                                                                                         
Atelye a:

• Bèt espesyal: N’ap bay yon ti detay sou karakteristik anfibyen yo. Patisipan yo ka apran klasifikasyon bèt sa yo nan kategori vètebre yo. Nou pral fè yo konnen tou definisyon mo anfibyen an aK orjin li, se kon sa nou pral ka eksplike sak fè yo se anonsè, yo viv soutè ak nan dlo.
  
• Po ak Eskèlèt: Bay yon ti definisyon tou kout sou anatomy (Kò, mis, po, eskèlèt ak sistèm nè, respirasyon, branch trip, sikilasyon, ak reprodiksyon).
• Kote anfibyen rete: N’ap diskte sou tout abita kote bèt sa yo viv ak koman lavi yo adapte pou yo rete nan Karayib la ak sou tèt Mòn ki pi wo an Ayiti yo.
• Ki sa yo manje?: Sou pwen sa nou ap pale de tout kalite manje nou bay bèt yo nan kad pwogram konsèvasyon ex situ epi itilize sa pou eksplike enpòtans krapo (Ywondèl ak chòchòd) kòm ajan ki ap kontrole popilasyon pès.
• Metamòfoz: N’ap fè yon rale sou tout etap krapo franchi lè y’ap grandi, eksplike faz devlòpman yo soti depi nan etap bannbony. Pou fè ti moun yo konprann pati sa n’ap konpare lavi yo ak pa krapo yo, n’ap montre chanjman kifèt nan kò pigran ki fòme déjà yo  ak timoun ki pako nan fòmasyon.
• Menas yo: N’ap pale de tout bagay ki lakòz popilasyon krapo yo diminye nan peyi a. N’ap analize an detay tout menas yo ak solisyon posib ak patisipan yo.
•   Kisa ki fèt déjà pou konsève yo?: Bay yon ti detay sou travay kèk chèchè fè pou konsève popilasyon krapo nan mond lan ak travay nou fè nan peyi a.
  
  
• Avantaj anfibyen ban nou?: Nou ap pale de enpòtans anfibyen ak tou benefis moun jwen nan sèvis  anfibyen bay sou planèt la.
  
• Lejann ak Verite: Nou ap eksplike ti moun yo ak granmoun yo de sa yo kon de krapo, pa egzanp. Yo ka ba’w pwazon ki ka touye’w, ba’w vè! .Avan nou fini atelye a n’ap chanje mantalite yo poufè yo kwè anfibyen (krapo) se bon bèt yo ede nou epi bay bel son nou ka imite.